البنكنوت(بموسيقى) - مصطفى إبراهيم by Rafik Adly | رفيق عدلي published on 2014-12-04T18:09:19Z موسيقى و هندسه صوتيه : رفيق عدلى Recorded and mixes at One Take Studio هيحزّموك زي الجنيه ف الأستك هيسيبولك الفُتات و يبيعولك الأمل ف الإعلانات و الهجرة لبلاد البلاستيك و ف خطبة الجمعة عن الجنة و قُولِة استنى.. فات الكتير هانت خلاص لحد ما خيل الحكومة.. يدوسه عَجَل الميكروباص النظام العالمي بيقتل أوقات كتير .. من غير رصاص الهوا .. هيحَصّل المَيّة اللي بقت ماركات تعددية تعني.. تعدد الشركات حرية تعني حق فتح القفص .. على الناس اللي ملهاش باب الأخطبوط الرأسمالي اتساب على الناس اللي ملهاش حظ على الناس اللي ملهاش فرص حياتك مهمة لبياعين الحلم وفاتك مهمة لبياعين القُرَص حسابك حتى في قبرك مهم رخصة الجنة مهمة لبياعين الرُخَص و لبياعين الدين و لبياعين الآخرة اللي هتنصف المساكين "العالم بيتطوّر" يمشي إسم مسرحية.. أما الحقيقة المضحكة المُبكيّة.. العصاية اللي بتوقّف و بتدوّر.. بتمشي.. من إيد صحاب الجنة.. لصباع صحاب البندقية.. لجيوب صحاب البنك... دم الغلابة بيتحرق ف التانك... شامم ريحتهم و انتا بتفوّل... الغرب هيموّل.. إعمار ِبيار النفط.. لضمان زيادة منسوبات الشفط... و ضمان بقائك عبد متسوّل... يا زميل الكوكب المنكوب.. رَكب الحضارة ماشي بالمقلوب... يا زميل المنطقة المنكوبة... رَكب الحضارة كان لازم له ركوبة... العالم بيتطوّر... و انتا شمعة بتتحرق علشان .. برج التجارة ينوّر.. ..العصاية هي هي و شكلها بيتحول العالم بيتغوّل و انتا واقف ف وش الطيارات بالطوبة.. هتعيش حمار و تموت حمار... أخرك تحس بإنتصار لما... بتولّع الأعلام.. و تدوس على صورة إصحاب الدولار و القرار بالجزمة.. القناة ..في نشرة الأخبار.. هيقولوا عنك فوضوي و قاتل.. نفس القناة وقت اللزوم .. هتطلّعك مقتول و بتناضل.. فيه ناس كتيرة أكل عيشها الأزمة.. و ده عيبه.. إن هذا العالم صوته من جيبه. و مفيش حقيقة صعب تتأوّل.. و دي ناس تعرف تبيع الآه زي ما بتعرف تبيع اللأ الميديا بائع حق... متجول.. بشرى لابناء العالم التالت م العالم الأول بشري لابناء العالم الهمجي م العالم الإنسان العالم الحر اللي ما بيضربش ف المليان بس بيجوّع بلاد لحد الموت القاتل الشيك المحترف أبو طلق من غير صوت فيه الجيوش ما بقوش لابسين هدوم ميري و الطيارات ما بقتش بتوزع منشورات اليأس و البنوك مش هيسيبوك تتحبس ...بالعكس النهارده حاطط إعلانات ع التاكس علشان عليه أقساط بكره تتعلق على هدومك زي اللعيبة ف الماتشات عالم جديد هتخشه بمزاجك قبل ما نزُقّك الكهنة فيه لابسين بدل و كرافتات هيأكِّلوك الحقيقة بمعلقة ف بقك و كسر حُقّك ياللي مش عايز عالم ديمقراطي رأسمالي سعيد الشركة فيه اقوى من الاوطان غضبان ؟...أكيد غضبان مربوط ف ساقية و بتجري في مكانك مسجون و مش عارف وش سجّانك عايز تخبّط كوبايات الحبس ع القضبان لكن هتعمل إيه ...معذور أمريكا عملت سجن من غير سور أمريكا رابطة الناس ف بعضيهم أمريكا رابطة الناس و مربطّاك بيهم تدّن في مالطا قد ما هتدّن أمريكا هتفضل بتحب البشر جدا... و بتعمل جِميل فيهم.. فيها الخير يا هل ترى ولّا فيها فلوس؟ أمريكا فيها الحلم و بلادنا فيها كابوس الناس تخاف امريكا تحميهم الناس تجوع امريكا تديهم تِكسي بالإيد اليمين اللاجئين بعد ما إيديها الشمال تعرّيهم شركة بتهِدّ البلاد و شركة تبنيهم شركة بتبيع السلاح و شركة بتطبطب على اللي يموت العالم بيتقسّم دول العالم بيتقسّم بيوت العالم بيتقسم لبني آدم و لبنكنوت مكتوب على شهود البلاد الممسوحين بأستيكة أنتَ حر ما لم تضر أمريكا Mostafa Ibrahim https://www.facebook.com/mostafa.ibrahim?fref=ts Rafik Adly https://www.facebook.com/pages/Rafik-Adly-Works/105834799486969?ref=notif¬if_t=page_user_activity OneTake Studio https://www.facebook.com/pages/Onetake-Studio/627330647334095 Genre البنكنوت Comment by Hesham Abdeldaym الشركة فيه أقوى من الأوطان 2023-09-23T14:53:11Z Comment by Amr Hegazy 2 ❤️❤️❤️❤️❤️ 2023-03-29T00:11:57Z Comment by Samaa youssef الرأسمالية هتبلعنا كلنا. 2023-03-11T22:02:51Z Comment by Samaa youssef ياسلام.💙 2023-03-11T22:00:05Z Comment by Rasha Hamdy مسجون مش عارف وش سجانك 2022-12-27T05:45:33Z Comment by Mona ❤️Respect 2022-12-12T09:33:46Z Comment by Mahmoud Mohamed Faried الموسيقى معبرة جدا.. اول مرة يعجبني اضافة موسيقى للإلقاء 2022-10-26T14:27:12Z Comment by Mahmoud Khalifa فى ناس كتير أكل عيشها الازمه ، وده عيبه أن هذا العالم صوته من جيبه 2022-09-11T02:45:12Z Comment by Ahmed Eltelbany امريكا فيها الحلم .. وبلادنا فيها كابوس 2022-02-08T23:37:54Z Comment by Meda Eldebany ❤️❤️❤️ 2022-01-12T15:01:19Z Comment by Ahmed i can't stop listening to 2022-01-07T16:14:52Z Comment by مريم الموسيقى اضافت جو عظيم للكلام ❤️ 2020-08-17T18:31:23Z Comment by Fathia Ahmed 2 رأئع 2020-01-27T00:22:31Z Comment by Mariam Ibrahim عظمة 🌺 2020-01-03T19:30:01Z Comment by Zoo Ani الله 2019-11-20T09:34:05Z Comment by Amr Alshnawy رخصة الجنه مهمة لبياعين الرخص 2019-05-13T16:35:37Z Comment by Äñä Mäñdö حلوه 2019-04-28T22:01:15Z Comment by MǾĥãmed Ğămäl بسم الله ماشاء الله عليك والله 2017-05-01T01:43:24Z Comment by T. Masry انت جبت الكلام دة ازاى 2016-07-16T12:23:14Z Comment by faridfox في رأيي الموسيقى ادتها بعد رابع 2016-04-02T11:16:29Z Comment by faridfox أووووووووووووووف 2016-04-02T09:27:44Z Comment by Ahmed Alex الغرب هيموّل.. إعمار ِبيار النفط.. لضمان زيادة منسوبات الشفط… و ضمان بقائك عبد متسوّل… يا زميل الكوكب المنكوب.. رَكب الحضارة ماشي بالمقلوب… يا زميل المنطقة المنكوبة… رَكب الحضارة كان لازم له ركوبة… العالم .. بيتطوّر… و انتا شمعة بتتحرق علشان .. برج التجارة ينوّر.. ..العصاية هي هي و شكلها بيتحول العالم بيتغوّل و انتا واقف ف وش الطيارات بالطوبة.. هتعيش حمار و تموت حمار… أخرك تحس بإنتصار لما… بتولّع الأعلام.. و تدوس على صورة إصحاب الدولار و القرار بالجزمة.. 2016-01-30T11:55:06Z Comment by Tarek Saad 2 العالم بيتطور ... وإحنا بنتدهور 2015-09-01T07:07:14Z Comment by Muhammed Wanas الهوا هيحصل الميه اللي بقت ماركات 2015-07-11T05:48:08Z Comment by Mohamed Abd El Meged القصيده بقت افشخ بالموسيقي ... ريسبكت 2015-03-29T22:57:08Z Comment by asmaahassan ريتم الموسيقى ملوش علاقة بالقصيدة 2014-12-30T14:12:18Z Comment by ℋala ℋamdi ♫ للاسف معجبتنيش المزيكا خالص ، لا تقارن ب المانيفستو 2014-12-17T17:32:17Z Comment by El Shamy :( :( :( :( بشرى لابناء العالم :\ 2014-12-15T13:22:19Z Comment by mo khafagy انت حر مالم تضر.......... امريييييكا 2014-12-15T01:53:26Z Comment by ِِAhmed M. Elesseily تدن فـ مالطة أد ما هتدن أمريكا هتفضل بتحب البشر جداً 2014-12-15T00:15:43Z